Парламентарни избори се одржуваат денес во Бугарија, а според првичните анкети и излезни резултати, убедливо води Румен Радев, кој се наметнува како главен кандидат за состав на новата влада.
Според најновите податоци, коалицијата предводена од Радев освојува околу 37 до 39 проценти од гласовите, што е двојно повеќе од неговите најблиски политички ривали.
Овие резултати го ставаат Радев во позиција да биде клучниот фактор во формирањето на идната влада, иако се очекува да му бидат потребни коалициски партнери за стабилно мнозинство.
Изборите се одржуваат во услови на долготрајна политичка криза, при што ова е веќе осми изборен циклус во последните неколку години, по падот на претходната влада и серијата антикорупциски протести.
Радев, кој претходно ја напушти претседателската функција за да учествува на изборите, кампањата ја градеше врз пораки за борба против корупцијата и политичка стабилност.
Сепак, тој не е непознат за македонската јавност по своите контроверзни ставови.
Во 2022 година, Радев изјави дека „историјата меѓу двете земји е заедничка до 1944 година“, став што во Македонија беше протолкуван како негирање на посебниот македонски идентитет и историска самобитност.
Токму ваквите изјави и денес предизвикуваат реакции, особено во контекст на можноста тој да ја предводи бугарската влада во наредниот период.
Дополнително, Радев остана запаметен и по средбата со Гордана Силјановска-Давкова во Софија, каде на фотографиите беа поставени две бугарски знамиња, без македонско. Овој потег во Македонија беше протолкуван како дипломатски пропуст, но и како уште една порака што предизвика негативни реакции во јавноста.
