Градоначалникот на Општина Чаир, Изет Меџити, објави повеќе од десет фотографии од пречекот на министерката за Европа и надворешни работи на Република Албанија, Елиса Спиропали, кој се одржа во Скопје. На фотографиите, споделени на неговите профили на социјалните мрежи, се забележуваат исклучиво албански национални знамиња, без присуство на државни симболи на Северна Македонија.
Во објавата, Меџити наведува дека заедно со Спиропали положиле цвеќе кај бистата на Ѓерѓ Кастриот – Скендербег, на плоштадот што го носи неговото име, при што ја истакнува симболиката на, како што наведува, заедничката историја, идентитетот и отпорот. Според него, настанот претставувал потсетник дека националните вредности треба да останат водилка и во современиот политички контекст.
Градоначалникот дополнително посочува дека со вакви средби се испраќа порака за зајакнување на соработката и градење мостови меѓу државите и политиките. Сепак, визуелниот аспект на настанот предизвика реакции во јавноста, особено поради отсуството на македонски државни обележја, имајќи предвид дека посетата се одвиваше во главниот град на државата.
Дел од јавноста и критичарите оценуваат дека ваквиот протокол и начинот на претставување оставаат впечаток на еднонационална симболика во мултиетнички и државен контекст, што повторно ја отвора дебатата за односот кон државните институции и симболи при официјални и полуофицијални средби со странски функционери.
Настанот го актуелизира и прашањето за границата меѓу етничката припадност, локалната самоуправа и државниот протокол, како и за пораките што се испраќаат до јавноста преку визуелната презентација на вакви настани.
