Во италијанската покраина Анкона е регистриран нов случај на семејно насилство со трагичен исход. Убиена е 49-годишната Саџиде Муслија, македонска државјанка која живеела во селото Пјанело Валесина. Нејзиното тело било пронајдено во домот, во кревет, со тешки повреди на главата и знаци на физичко насилство.
Главен осомничен за убиството е нејзиниот сопруг, 54-годишниот Назиф Муслија, исто така македонски државјанин. Италијанските карабинери соопштија дека тој бил во бегство по нападот, но бил лоциран и пронајден сериозно повреден на оддалечена локација. По укажаната медицинска помош, против него ќе биде поведена постапка.
Локалните медиуми ја објавија неговата фотографија по барање на истражните служби, бидејќи надлежните органи претходно издадоа наредба за апсење.
Според информациите на италијанската агенција АНСА, жртвата и во минатото пријавувала семејно насилство. Надлежните службеници потврдија дека полицијата имала интервенции во нивниот дом и дека постоеле претходни пријави за физички напади.
Случајот повторно го отвора прашањето за заштитата од семејното насилство и за тоа дали институциите можеле да спречат уште една трагедија. Италијанските обвинители веќе работат на реконструкција на настаните и на прибирање дополнителни докази.
Истрагата продолжува.
