Македонската кошаркарска судијка Ема Никочевиќ вечерва се врати на судењето, неколку месеци откако поради тешка болест се наоѓаше во сериозна живота опасност.
Оттаму, прекрасна е веста дека одличната судијка не само што излезе како победник од најважната битка, туку и се врати на делењето на правдата на вечерашиот кошаркарски дуел меѓу кадетските селекции на Македонија и Швајцарија.
„По двомесечна пауза, моето враќање на теренот како кошаркарски судија беше исполнето со мешавина од возбуда и неизвесност. Искрено, имав многу прашања во главата. Односно дали ќе успеам да се снајдам, дали ќе ја издржам физичката динамика на натпреварот, и дали ќе го следам критериумот што го бара играта“– не ги крие своите емоции Ема во изјавата за официјалната веб-страница на КФСМ.
Како што вели, некако се сè „вратило на своето место“…
„Сомнежот исчезна веднаш штом ја ‘свирнав’ првата одлука. Во тој момент, сè си дојде на свое место и влегов во ритам. Се чувствував сигурно, стабилно и поддржано, благодарение на извонредниот судиски тим што беше со мене, Иван Мијалковски и Бисера Јакова, делегатот, како и целата записничка маса, кои имаа разбирање и создадоа пријатна и професионална атмосфера“- вели Никочевиќ, и дополнува:
„Особено сакам да изразам голема благодарност до кошаркарската федерација на Македонија за континуираната поддршка. Тоа што повторно бев на терен, и што се снајдов одлично, ми донесе исклучителна радост и потврда дека сум подготвена и посилна од кога било. Овој натпревар за мене беше повеќе од само спортска задача, за мене значеше лична победа“.
