Двајца возачи се здобиле со тешки телесни повреди, а малолетен сопатник е повреден во сообраќајна несреќа што се случила во радовишкото село Ораовица, информираат од Министерството за внатрешни работи.
Несреќата била пријавена на 14 јуни околу 16:30 часот во ОВР Радовиш, а се случила на местото викано „Манастирско место“.
Според информациите, во судирот учествувале мопед „априлија“ со радовишки регистарски ознаки, управуван од 15-годишник од село Ораовица, и мотоцикл „хонда“, кој го управувал К.Т. (18) од селото Подареш.
Во несреќата со тешки телесни повреди се здобиле двајцата возачи, додека телесни повреди добил и 16-годишниот сопатник на мопедот од Ораовица. Повредите биле констатирани во Клиничката болница во Штип.
Увид на местото на несреќата извршила увидна екипа на ОВР Радовиш, при што било утврдено дека и двајцата возачи управувале со возилата без возачка дозвола.
Од МВР најавуваат дека по целосното документирање на случајот ќе бидат поднесени соодветни пријави.
