Пожар избувна вечерва во и околу каналот кој минува покрај Арачиново во правец кон Белви, предизвикувајќи загриженост поради близината на инфраструктурни објекти со потенцијален ризик.
Според информациите од терен, огнот е во непосредна близина на цистерните на „Макпетрол“, а во близина се наоѓа и бензинска пумпа.
Пожарот се шири низ простор обраснат со трска и сува трева, материјал кој лесно гори и може да придонесе за брзо ширење на пламените јазици доколку се променат временските услови или засили ветерот.
Директорот на Дирекцијата за заштита и спасување, Стојанче Ангелов, информира дека пожарот гори претежно во трска и сува трева во и околу каналот.
„Пожар во и околу каналот кој минува покрај Арачиново во насока кон Белви. Гори претежно трска и сува трева во и околу каналот. БППЗ Скопје се на терен, имаат почетна контрола, засега нема опасност од неконтролирано ширење“, соопшти Ангелов.
Противпожарните екипи се на терен и работат на локализирање на огнот, додека состојбата продолжува да се следи поради близината на објектите.
