Црна Гора повеќе од еден месец е потресена од голем јавен скандал во кој се вклучени поранешниот директор на Агенцијата за национална безбедност, Дејан Вукшиќ, и поранешната државна секретарка Мирјана Пајковиќ.
Двајцата поднесоа оставки од своите функции, а случајот резултираше со меѓусебни кривични пријави и сериозни обвинувања за уцени и притисоци. И Вукшиќ и Пајковиќ како официјална причина за оставките ги наведоа „личните причини“.
Поранешниот прв човек на АНБ тврди дека неговиот мобилен телефон бил злоупотребен, по што во јавноста се појавиле компромитирачки материјали. Тој поднел кривични пријави за кражба, злоупотреба и обиди за уцена, додека Пајковиќ возвратила со пријави за неовластено дистрибуирање на приватни материјали.
Од Националната безбедносна агенција соопштија дека случајот не е поврзан со работата на институцијата, додека Обвинителството сè уште нема јасен став дали постапката ќе продолжи пред суд.
Според законите во Црна Гора, неовластеното објавување приватни материјали претставува кривично дело за кое се предвидени казни до пет години затвор.
Вукшиќ, кој поднесе оставка и од функцијата советник на претседателот, изјави дека случајот ќе го решава самостојно, додека во јавноста продолжуваат шпекулациите и меѓусебните обвинувања меѓу вклучените страни.
Скандалот предизвика силни реакции и отвори поширока дебата за приватноста, злоупотребата на лични податоци и одговорноста на јавните функционери во Црна Гора.
За снимки и повеќе кликни ТУКА.
