Канал 5: Шест лица приведени поради ширење лажни информации за водата во Скопје
Шест лица се приведени во рамки на истрагата за ширење лажни информации дека во водата од скопскиот водовод е пронајдена бактеријата ешерихија коли, дознава Канал 5 од извори во истрагата.
Според информациите, приведувањата се резултат на координирана акција на Министерството за внатрешни работи, откако во текот на денот на социјалните мрежи и преку пораки почнаа масовно да се шират тврдења дека водата за пиење во Скопје е загадена.
Надлежните институции претходно ги демантираа ваквите информации и соопштија дека водата од скопскиот водовод е безбедна за пиење, а случајот беше оценет како сериозно ширење дезинформации што предизвика вознемиреност кај граѓаните.
Истрагата продолжува, а се проверува дали во ширењето на лажните информации биле вклучени и други лица.
Засега не се соопштуваат повеќе детали за идентитетот на приведените или за кривичните дела што евентуално ќе им бидат ставени на товар.
