Република Српска усвои нов Закон за заштита на здравјето од тутунски и сродни производи, со кој се воведува целосна забрана за пушење во сите затворени јавни простори, вклучително и во угостителските објекти. Законот стапува на сила на 1 август 2026 година, а неговата целосна примена е планирана за јануари 2027 година, со преоден период за прилагодување на локалите.
Новите правила не се однесуваат само на класичните цигари, туку и на електронските цигари, загреаните тутунски производи и никотинските кесички. Сопствениците на објекти ќе имаат обврска да ги отстранат пепелниците, да постават јасни ознаки за забрана и да обезбедат целосно почитување на законот во своите простории.
Предвидени се строги казни за прекршителите – до 2.000 конвертибилни марки за физички лица и до 6.000 марки за сопствениците на објекти кои нема да ги спроведат пропишаните мерки.
Министерот за здравство, Ален Шераниќ, изјави дека законот има силна поддршка од јавноста и дека над 70 проценти од граѓаните, и пушачи и непушачи, ја поддржуваат оваа мерка. Во изјава за Deutsche Welle тој нагласи дека целта е заштита од пасивно пушење и превенција на никотинска зависност кај младите.
Здруженијата за јавно здравје ја поздравуваат одлуката како важен чекор кон намалување на респираторните заболувања и ризикот од рак на белите дробови кај непушачите. Од друга страна, дел од угостителите и пратениците предупредуваат дека целосната забрана може негативно да влијае врз малите локали и традиционалната кафанска култура.
И покрај поделениот јавен став, со овој закон Република Српска се изедначува со Федерација Босна и Херцеговина, која слични мерки воведе една година претходно, но со поблаги услови за угостителите. Властите порачуваат дека нема да има отстапки кога станува збор за заштитата на јавното здравје.
