Полска употреби оружје за да собори дронови над својата територија, откако тие повеќепати навлегле во нејзиниот воздушен простор за време на рускиот напад врз Украина, соопшти рано во средата Оперативната команда на полските вооружени сили на платформата X.
„За време на денешниот напад на Руската Федерација, насочен кон цели во Украина, со повеќекратни упади на дронови беше повреден нашиот воздушен простор“, се наведува во изјавата. „На барање на Оперативната команда на полските вооружени сили беше употребено оружје, а во тек е потрага по соборените цели“.
Полските и сојузничките авиони беа активирани и распоредени рано во средата за да го штитат полскиот воздушен простор.
„Полските и сојузничките авиони дејствуваат во нашиот воздушен простор, додека копнената противвоздушна одбрана и радарските извидувачки системи се на највисоко ниво на готовност“, порача Оперативната команда на полските вооружени сили на X.
Се додава дека е во тек воена операција и се повикуваат граѓаните да не ги напуштаат своите домови, при што како најзагрозени региони се наведуваат Подласки, Мазовјецки и Лублин.
Премиерот Доналд Туск потврди на X дека Полска употребила оружје за да ги собори леталата и дека е во тек операција поврзана со повторените упади. За операцијата за неутрализација на објектите што навлегле во полскиот воздушен простор бил информиран и полскиот претседател, објави полскиот министер за одбрана Цезари Томчик во средата на X.
„Сите служби се активни“, порача тој, предупредувајќи ги граѓаните да не се приближуваат до остатоците од соборените објекти. Тој додаде дека е во постојан контакт со командата на НАТО.
