Лучиано Фратолин (45) некогаш се претставувал како успешен бизнисмен со гламурозен живот, управувајќи со компанија за кафе. Но, кога во понеделник се појавил на суд како обвинет за убиство на својата ќерка Мелина, изјавил дека е финансиски уништен и дека не може да си дозволи адвокат, пренесе ABC News.
Роден во Етиопија, Фратолин со голема љубов зборувал за ќерка му на веб-страницата на неговата компанија „Gabella Coffee“ со седиште во Монтреал, нарекувајќи ја „прекрасна“ и „светлина во неговиот живот“. Но, позади оваа идилична слика се криеле вознемирувачки детали.
Во истата биографија – сега веќе избришана – открил дека тешко се носел со тоа што морал да прифати нередот кој Мелина го создава со нејзините креативни проекти и играчки, бидејќи самиот бил опседнат со редот во домот.
Покрај тоа, Фратолин зборувал и за личните тешкотии низ кои минувал – од расизам и чувство на осаменост, до смртта на татко му додека бил тинејџер. Посочил и на „трагичен настан“ во 2019 година што оставил длабоки последици врз неговата психа, по што следувал долг и тежок период на закрепнување.
Полицијата изјавила дека токму таа година се разделил од сопругата.
Дополнително, тој се соочувал со финансиски проблеми – должел над 200.000 долари поради деловни зделки во Монтреал. Во 2020 година започнал да изнајмува имот во престижниот кварт Мајл Енд преку Airbnb, а за управување со него ангажирал две лица кои требало да ја покриваат киријата. Со приходите од таму, според неговите наводи, плаќал алиментација.
Но, до август 2024 година заостанувал со 26.000 долари, по што му бил раскинат договорот за закуп и му бил забранет пристап до имотот – каде што ги чувал зимските алишта и играчки на ќерката. Тој сега ги тужи управителите за 115.000 долари, обвинувајќи ги дека го злоупотребиле имотот и не ги извршиле обврските.
Од нивна страна, било изнесено тврдење дека Фратолин планирал да избега и да ги повлече сите средства од банкарската сметка, што тој го негира.
Вработен во „Café Dépanneur“, фирма која тој ја поседувал, открил дека Фратолин последните 18 месеци живеел на релација Италија – Канада, додека сè уште ѝ должи 83.000 долари на Банката на Нова Шкотска. Исто така, има и неплатен долг од 97.000 долари на кредитна картичка поврзана со друго кафуле, поврзано со неговиот бренд.
И покрај тоа, неговиот Инстаграм профил покажува сосема различна слика – преполн е со фотографии од луксузни автомобили и патувања, со објави во стил „Зависен сум од Порше“.
Таткото и неговата ќерка Мелина биле на одмор на езерото Џорџ во северниот дел на Њујорк, кога девојчето било пронајдено мртво во водата. Пред да биде пронајдено телото, Фратолин тврдел дека таа била киднапирана од двајца мажи во бело комбе, околу еден час откако разговарала со мајка ѝ.
Обвинет е за убиство од втор степен – што во Њујорк може да значи доживотен затвор – како и за прикривање на човечки труп. Наредното рочиште е закажано за 25 јули.
