Најстарите споени близнаци на светот, Лори и Џорџ Шапел, починаа, објави Гинисовата книга на рекорди.
Лори и Џорџ починаа на 7 април во болницата на Универзитетот во Пенсилванија, а причината за смртта се уште не е утврдена.
Имале 62 години и 202 дена. Родени на 18 септември 1961 година во Пенсилванија, Лори и Џорџ имале делумно споени черепи, споделувајќи ги виталните крвни садови и 30 отсто од нивните мозоци, имено фронталниот и париеталниот лобус. Сепак, тие се разликувале на многу начини.
Џорџ имал спина бифида и не можел да оди, па седел на столче налик на инвалидска количка што Лори ја туркала. Џорџ имал успешна кариера како кантри пејач, а Лори неколку години работела во болничка перална.
Во 2007 година, тие станаа првите истополови споени близнаци кои почнаа да се идентификуваат како различен пол, кога Џорџ почна да се идентификува како машко. Патем, Џорџ е роден како Дори, но прво го сменил своето име во Реб, пред да стане Џорџ.
Близнаците живееле во двособен стан во Пенсилванија. Секој имал своја соба, наизменично поминувајќи ја секоја вечер во различна соба. Тие се туширале посебно, користејќи ја завесата за туширање како бариера додека едниот се туширал, а другиот стоел надвор од кадата, објави Пипл.
Кога и да ги прашале дали посакуваат некогаш да се разделат, Лори и Џорџ секогаш одговарале не. „Дали би биле разделени? Апсолутно не. Мојата теорија е: зошто да го поправите она што не е скршено? рече Џорџ во документарец од 1997 година.
Близнаците се спротивставија на предвидувањата на медицинските експерти кои рекоа дека нема да преживеат ниту 30 години.
