Кичево вечерва го зафати силно невреме проследено со обилен дожд, кој за кратко време предизвика поплавување на дел од улиците во градот.
На видеата и фотографиите што кружат на социјалните мрежи се гледаат делови од градот целосно под вода, додека автомобилите со тешкотии се движат низ поплавените делници.
Според првичните информации, најпогодени се пониските делови на градот, каде атмосферската канализација не можела да ја прими големата количина дождовница.
Од Центарот за управување со кризи апелираат возачите да бидат внимателни и да избегнуваат движење по улици каде што има видлива вода на коловозот.
Според прогнозата на Управата за хидрометеоролошки работи, нестабилното време со повремени врнежи од дожд ќе продолжи и во следните денови, особено во западните и југозападните делови на земјата.
Во понеделник се очекува претежно облачно време со поројни врнежи, а локално е можно и пообилно количество дожд. Во вторник времето ќе биде променливо со слаби врнежи претпладне и разведрување попладне, додека во среда се најавува сончево и потопло време.
Метеоролозите издадоа жолто предупредување за интензивен дожд во југозападниот регион, кое ќе биде во сила во понеделник попладне и вечерта.
