Едно лице загина, а четворица се повредени во тешка сообраќајна несреќа што се случи синоќа околу 23:10 часот на улицата „Борис Трајковски“ во Скопје, соопшти Министерството за внатрешни работи.
Несреќата се случила при судир на два патнички возила со скопски регистарски таблички – „Фолксваген Голф“, управуван од 56-годишниот С.Х. од Скопје, и „БМВ“, кое го возел 28-годишниот Ф.П., исто така од Скопје.
Возачот на „Голфот“, С.Х., починал на самото место, а констатирана смрт извршил лекар од Итната медицинска помош. Телесни повреди здобиле неговите сопатници, 52-годишниот Н.Х. и 24-годишната М.Р.А., двајцата од Скопје, како и Ф.М. (28) од Косово, како и возачот на „БМВ“. Повредените веднаш биле пренесени во Градската општа болница „Св. Наум Охридски“ и во Комплексот клиники „Мајка Тереза“ каде им била укажана медицинска помош.
На местото на несреќата извршен бил увид од јавен обвинител и полициски екипи, а по неговата наредба телото на починатиот било предадено на обдукција.
