Рускиот претседател Владимир Путин му се извини на претседателот на соседен Азербејџан за соборувањето на комерцијалниот патнички авион во рускиот воздушен простор, во кој загинаа 38 лица – но не кажа дека Русија е одговорна.
Владимир Путин денеска му се извини на претседателот на Азербејџан за „трагичниот инцидент“ што се случи во рускиот воздушен простор со патничкиот авион на „Азербејџан ерлајнс“, кој се урна откако беше погоден од противвоздушна одбрана против украинските беспилотни летала.
Авионот на летот J2-8243 се урна во средата во близина на градот Актау во Казахстан, откако се пренасочи од јужна Русија, каде што беше објавено дека украински беспилотни летала напаѓаат неколку града. Загинаа најмалку 38 лица.
Четири извори запознаени со прелиминарните наоди од истрагата на Азербејџан за катастрофата изјавија за Ројтерс во четвртокот дека руската противвоздушна одбрана го соборила по грешка.
-Претседателот Владимир Путин се извини за трагичниот инцидент што се случи во рускиот воздушен простор и уште еднаш изрази длабоко и искрено сочувство до семејствата на жртвите и им посака брзо закрепнување на повредените, се вели во соопштението на Кремљ.
-Во тоа време Грозни, Моздок и Владикавказ беа напаѓани од украински беспилотни летала, а руските системи за противвоздушна одбрана ги одбија овие напади, соопшти Кремљ.
Кремљ соопшти дека разговорот се случил по барање на Путин.
Илхам Алиев, претседателот на Азербејџан, истакна дека авионот бил „подложен на надворешни физички и технички пречки во рускиот воздушен простор, што резултирало со целосно губење на контролата и пренасочување кон казахстанскиот град Актау“, соопшти претседателскиот кабинет на Азербејџан.
Патничкиот авион ембраер ЕМБР3.СА летал од главниот град на Азербејџан Баку до Грозни, во јужниот руски регион Чеченија, пред да скршне стотици километри од курсот преку Касписко Море.
