Страшна сообраќајна несреќа во Ирска повторно го стави во фокус проблемот со малолетничкиот криминал и новиот опасен тренд кај дел од младите – кражба на автомобили за возбуда, ризично возење и објавување снимки на социјалните мрежи.
Инцидентот се случил во округот Килдер, откако полицијата добила пријава за група маскирани млади лица кои наводно се обидувале да провалат во автомобили. По пристигнувањето на полициските екипи, автомобил „БМВ“ со пет млади лица се упатил во спротивна насока на автопатот М9.
Во возилото се наоѓале четворица тинејџери на возраст од 15 и 17 години, како и 18-годишен млад човек.
Според информациите, полицијата не започнала директна потера, туку поставила средства за запирање на возилото. Сепак, пред автомобилот да биде запрен, дошло до тежок судир со „Хјундаи“ во кој патувале три сестри и седумгодишно дете.
Петте лица од „БМВ“-то починале на местото на несреќата, додека жените и детето биле пренесени во болница со сериозни повреди.
Трагедијата повторно го насочи вниманието кон таканаречената група „Лаки Дип“ (Lucky Dip Gang), за која се тврди дека има околу 60 членови, а најмладиот меѓу нив има само 14 години.
Полицијата смета дека дел од младите не ги крадат автомобилите поради финансиска корист, туку поради возбуда, докажување пред врсниците и создавање содржини за социјалните мрежи.
Иако официјално не е потврдено дека загинатите биле дел од оваа група, според медиумските извештаи, најмалку тројца од нив претходно објавувале снимки со опасно возење и користеле назив поврзан со „Lucky Dip Gang“.
Групата во 2025 година била означена како организирана криминална структура, откако била поврзана со околу 300 инциденти во период од само три месеци. Станувало збор за кражби на автомобили, провали и други кривични дела.
Според полициските податоци наведени во извештаите, 11 од најактивните членови на групата имале вкупно 427 обвиненија, а нивната просечна возраст била само 16 години.
Случајот повторно ја отвори широката општествена дебата во Ирска за тоа како да се спречи сè почестото вклучување на малолетници во криминал, кражби на возила и опасни активности кои можат да завршат со трагични последици.
