Албанската опозиција од утре започнува протести пред Владата во Тирана, со најава дека демонстрациите ќе продолжат „сè до уривање на нарко-режимот“.
Лидерот на Демократската партија, Сали Бериша, порача дека протестите засега ќе се одржуваат секој понеделник и дека, како што вели, „нарко-режимите се соборуваат само со методите што се користеа во Непал“.
„Немаме друг избор освен граѓански отпор. Само масовни и упорни протести можат да ја тргнат оваа Влада. Албанците денес имаат историска задача – да ја соборат диктатурата која се темели на дрога, криминал и ограбување на граѓаните“, изјави Бериша.
Тој ја обвини Владата и за парламентарните избори од 11 мај, тврдејќи дека станувало збор за „фарса“, за што, според него, сведочел и извештајот на ОБСЕ/ОДИХР на 45 страници.
„Ако ја прифатиме реалноста, тогаш мораме да се спротивставиме со целата наша храброст. Сите кои сакаат слободен глас имаат обврска да ѝ се спротивстават на оваа власт, до враќање на демократското право на граѓаните“, порача Бериша.
Протестот ќе се одржи под мотото: „Протестирам – за семејството, за економијата, за демократијата“.
