Царините од 33 отсто што ни ги воведе САД се очекувани. Тоа беше јасно веднаш после инаугурацијата на претседателот Доналд Трамп и тој тоа го кажа. Ни една земја во Европа не беше подготвена за тоа и никој не се подготвува претходно, рече вечерва премиерот Христијан Мицкоски.
Додаде дека предложил да се потпише договор за слободна трговија со САД и додаде дека и во нашиот царински тарифник за некои групи на производи имаме царини повисоки од 60 проценти.
-Уште во јануари со тогашниот заменик на помошникот државен секретар, Александар Касаноф разговаравме за потпишување на билатерален договор во рамките на Стратешкиот дијалог меѓу двете земји во делот на економијата и трговијата. Уште тогаш почнавме знаејќи дека ќе следат вакви процеси. Мислам дека тоа беше вистинскиот пат кој почнавме да го чекориме. Потоа како дел од целиот овој процес од наша страна се предложи да потпишеме договор за слободна трговија со САД и да нема царини. Дадов налог нашите надлежни институции да видат дали можеме да потпишеме ваков договор согласно важечките договори и истото му го предложив на државниот секретар за трговија на САД, Хауард Лутник. Денеска разговор на оваа тема со него во Брисел имаше и министерот за надворешни работи Тимчо Муцунски, како и со уште еден висок претставник на Белата куќа одговорен за Балканот. Од сите страни ова е поздравено како одлична идеја, рече Мицкоски во интервју за ТВ Алфа.
