Фокусот на Москва на војната во Украина останува непроменет, објави руското Министерство за надворешни работи по победата на Доналд Трамп на претседателските избори во САД.
Во соопштението за медиумите, руското МНР нагласува дека нема илузии за Доналд Трамп и дека ќе соработува со новата американска администрација бранејќи ги своите интереси.
Утринава портпаролот на Кремљ, Дмитриј Песков, соопшти дека не е запознаен со никаков план на рускиот претседател Владимир Путин да му честита на Трамп и додаде дека Соединетите Американски Држави сè уште се непријателска земја.
Трамп неколкупати изјави дека брзо ќе ја заврши војната во Украина, иако не објасни како би се постигнал тој мир и како би изгледал. Тој, исто така, одби да каже дали смета дека Украина треба да ѝ отстапи територија на Русија и ги повика републиканските политичари да го блокираат законодавството што би обезбедило нова помош за Киев на почетокот на оваа година.
За време на кампањата, тој го опиша украинскиот претседател Володимир Зеленски како „најголемиот продавач“ во светот за обезбедување на оружје во вредност од десетици милијарди долари и друга помош што Вашингтон му ја обезбеди на Киев.