Дарко Гејслер Недељковиќ (43), близок до т.н. шкаљарски клан, брутално бил ликвидиран пред две години во Сао Паоло, Бразил, пред очите на сопругата и нивниот четиригодишен син.
Убиството се случило на 5 јануари 2024 година, откако Недељковиќ со семејството се враќал од вашар.
Според извори блиски до истрагата, платен убиец го следел Гејслер неколку дена, а во моментот кога жртвата застанала пред портата од својот дом, напаѓачот му се приближил одзади и испукал шест куршуми. Гејслер подоцна починал во болница од здобиените повреди, додека напаѓачот побегнал. Малолетното дете и сопругата останале неповредени.
Бразилските истражители посочуваат дека станува збор за професионално извршена ликвидација, која отстапува од локалниот „модус операнди“ и носи јасни елементи на балкански мафијашки пресметки. Недељковиќ со години се криел во Бразил и користел лажни документи, а неговата локација била откриена само неколку недели пред убиството.
Мотивот за ликвидацијата сè уште не е официјално потврден, но се верува дека е поврзан со долгогодишниот конфликт меѓу шкаљарски клан и кавачки клан, кој од 2014 година предизвика низа убиства и пресметки на територијата на Црна Гора, Србија, Шпанија и Грција.
Убиството на Гејслер е дел од серија насилни пресметки на Балканот, во кои се вклучени високопозиционирани членови на криминални групи, а бројни напади и ликвидации се регистрирани во последните пет години, како во Европа, така и на Балканот.
