Ужасна експлозија и пожар што избувнаа на новогодишната ноќ целосно уништија еден клуб во Швајцарија, во луксузниот скијачки центар Кран-Монтана, оставајќи зад себе сцени на пустош.
За време на трагичната новогодишна ноќ, исчезна и 31-годишниот Стефан Ивановиќ, по потекло од Србија, кој работел во тој објект како обезбедувач.
Загриженото семејство наведува дека сè уште немаат информации за Стефан и се надеваат дека е жив. Ивановиќ, кој има двојно државјанство, живее и работи во Швајцарија повеќе од 20 години, а кобната ноќ бил на своето работно место.
– Стефан е брат на мојот сопруг. Работел како обезбедувач, односно како обезбедување во тој клуб и бил внатре во моментот на пожарот. Оттогаш му се губи секоја трага. Не знаеме дали е жив или мртов, немаме апсолутно никакви информации. Одредени портали објавија дека меѓу гостите немало српски државјани, но Стефан има двојно државјанство, што можеби предизвикало забуна – изјави Марина за порталот Телеграф.
Семејството апелира до сите што имаат какви било информации за Стефан Ивановиќ да ги контактираат, нагласувајќи дека секоја вест им е исклучително важна.
– Тој живееше тука некое време, а потоа се врати во Швајцарија. Никој не го видел откако се случи трагедијата. Би биле благодарни за каква било помош од било кого – институции, влада или амбасада – додава загрижената роднина.
Дополнителна надеж за семејството дава фактот дека мобилниот телефон на Стефан сè уште бил достапен неколку часа по несреќата, што укажува на можноста дека тој е жив и дека некаде е згрижен.
Да ве потсетиме дека 47 лица загинаа, а повеќе од 100 беа повредени во експлозијата и пожарот што се случија околу 1:30 часот по локално време во барот „Le Constellation“ во швајцарскиот скијачки центар Кран-Монтана.
Причината за експлозијата сè уште не е официјално потврдена, но се сомнева дека станува збор за пиротехнички средства.
