Начелникот на одделението за општа управа и јавни служби во општина Коцељева, Радован Ранисављевиќ (57), е осуден на 14 години затвор за убиството на својата љубовница Јасмина Пуретиќ Лазаревиќ (46). Злосторството се случило на 23 септември 2020 година во белградското населено место Бариќ, а пресудата е донесена пред еден месец, пренесува Sd.rs.
Според истрагата, Ранисављевиќ со скали се искачил до прозорецот од куќата што двајцата ја изнајмувале и влегол внатре незабележано. По кратка расправија ја нападнал Јасмина и ја избол со нож, а потоа ја заклучил куќата и ги фрлил скалите, ножот и клучот за да ги сокрие трагите. Потоа побегнал кон мостот на Сава кај Шабац со намера да си го одземе животот, но полицијата го затекла таму, по што тој веднаш го признал делото и детално опишал како се случило убиството.
Полицијата по неговото признание влегла во куќата во Бариќ околу три часот по полноќ, каде го пронашла телото на Јасмина со повеќе убодни рани. Извршен бил увид, а материјалните докази – ДНК траги, отпечатоци и предмети – биле обезбедени. Ранисављевиќ потоа бил задржан во притвор во Белград.
Двајцата имале семејства и возрасни деца, а нивната тајна врска започнала по случајна средба во родното место. Блиските на Јасмина сведочеле дека ја предупредувале да раскине поради неговата изразена љубомора. Таа одлучила да го прекине односот околу шест месеци пред убиството, но Ранисављевиќ не го прифаќал раскинувањето и продолжил да ја прогонува. Нејзината мајка го опишала како „монструм познат по прогонување жени“, додавајќи дека би сторила сè за да ја спречи врската доколку знаела за неа. Јасмина зад себе остави син на 25 и ќерка на 17 години.
Обвинителот Владимир Гајиќ тврдеше дека делото било внимателно подготовено, посочувајќи ги скалите купени со соодветна висина, консумирањето алкохол за „охрабрување“, доаѓањето без најавување и нападот што жртвата не можела да го очекува. Според него, сите овие елементи укажувале на подмолност. Одбраната, пак, тврдела дека се работи за „несреќен момент“ и силен афект, објаснувајќи дека скалите биле понесени за чистење олуци и дека тој не ја планирал нејзината смрт.
На суд, Ранисављевиќ со треперлив глас изјавил дека жали и дека не можел да ги контролира своите постапки во моментот на убиството. Но, доказите и сведочењата не ја променија одлуката на судот.
Пред еден месец, Судиите во Палачата на правдата во Белград ја изрекоа пресудата: Радован Ранисављевиќ е осуден на 14 години затвор за убиството на Јасмина Пуретиќ Лазаревиќ.
