Италијанскиот потпретседател побара хемиска кастрација за напаѓачите кои наводно групно силувале тинејџерка во јавен тоалет во градот Катанија. Матео Салвини, лидерот на италијанската десница, рече дека 13-годишното девојче било „силувано од група од седум Египќани“ и дека може да има „само еден лек: хемиска кастрација“, што неговата партија Лега наскоро ќе ја предложи.
Членот на неговата партија, европратеничката Аналиса Тардино, додаде: „Остануваме цврсто на идејата дека ни треба хемиска кастрација за силувачите и педофилите, доживотен затвор за слични епизоди, како и поголема безбедност во нашите градови“.
Во паркот Вила Белини во Катанија, Сицилија на 30 јануари околу 19 часот и 30 минути е силувано 13-годишно девојче додека се шетало со своето 17-годишно момче. Група млади Египќани на возраст од 15 до 19 години ги натерале девојката и нејзиното момче да влезат во јавен тоалет, каде што некои од нив го држеле момчето додека други ја силувале девојката.
Седуммината осомничени, од кои тројца се малолетни, наводно илегално влегле во Италија во периодот од ноември 2021 до март 2023 година како „малолетници без придружба“, објави Ла Република. Тардино ги повика осомничените „веднаш да се вратат во својата татковина“. „Во Египет никогаш не би дозволиле такво однесување. Безбедноста на нашите деца мора да биде на прво место“, додаде таа.
Италијанската премиерка Џорџа Мелони, која викендов престојуваше во Катанија во однапред договорена посета, изјави дека е шокирана од веста. Таа изрази сочувство до жртвата и нејзиното семејство и вети дека „правдата ќе биде задоволена“.
Девојката рекла дека двајца од обвинетите ја грабнале, а другите нејзиното момче.
Таа рече дека се обидела да се ослободи, како и нејзиното момче, но тие не успеале да ги совладаат седумте тинејџери. Двајца од нив наводно ја силувале додека другите гледале. Таа рече: „И го натераа и моето момче да гледа“. „Врескаше, беше очаен. Им реков на напаѓачите: Ве молам, ве молам, не ме повредувајте, пуштете ме да одам“, додала таа.
Силувањето траело 30 минути, додека парот не успеал да се ослободи и да побегне. Тие веднаш ја алармирале полицијата, која успеала да ги фати напаѓачите за 24 часа. Жртвата идентификувала двајца малолетни сторители, соопшти вчера полицијата. Нејзиното момче ги идентификувало останатите пет.
Според обвинителството во Катанија, седуммина осомничени се обвинети за групно сексуално насилство.
