Фудбалската репрезентација на Македонија ги доби противниците за следниот циклус на квалификации за Светското првенство.
Белгија, Велс, Казахстан и Лихтенштајн се националните тимови со кои ќе се соочиме во претстојните дуели за настап на Мундијалот кој во 2026 ќе се одржи во САД, Мексико и Канада.
Со сите четири репрезентации сме сретнале во изминативе три децении, а најдолги се паузите во дуелите со Белгија и Велс кои и ни се директни конкуренти во трката за мундијалски настап.
Против Белгија последен пат сме играле во 2013 и тоа во квалификации за Светскиот куп и на тој натпревар сме поразени со 1:0. Претходно во Скопје загубивме со 2:0, а имаме уште еден пораз во 1995 кога исто така на националната арена сме совладани со 5:0, а тогаш натпреварот се играше без публика.
Првиот натпревар сме го одиграле на 16 ноември 1996 во Брисел, резултатот беше 1:1, а стрелец на тој единствен гол против Белгијците е Зоран Бошковски.
Против Велс имаме два квалификациски дуели за пласман на Светскиот шампионат и тогаш бевме во иста група и со Белгија. Во Скопје имаме победа од 2:1, а како гости доживеавме пораз од 1:0.
Со Казахстан имаме само еден контролен натпревар одигран во 2021 како дел од подготовките за настап на Европското првенство и тогаш славевме со 4:0.
Од сите конкуренти најчесто сме се соочиле со Лихтенштајн. До сега сме одиграле 11 натпревари на кои сме забележале 10 победи, а токму против оваа селекција го имаме и рекордниот триумф од 11:1.
Единствениот нерешен резултат го имаме во 2002 кога во квалификациите за Европското првенство во Вадуз мечот заврши 1:1.
