Македонија остана без една од најголемите актерски легенди. Почина Гоце Тодоровски, истакнат театарски, телевизиски и филмски актер, чиј богат опус остави неизбришлива трага во македонската култура.
Со својата препознатлива актерска харизма, извонреден талент и уникатно чувство за хумор, Тодоровски повеќе децении беше омилено лице на домашната сцена и миленик на публиката од сите генерации.
Особено ќе остане запаметен по бројните улоги во култната телевизиска серија „Македонски народни приказни“, преку која народното творештво го доближи до широката публика. Ликовите што ги создаде станаа дел од колективната меморија и оставија траен белег во македонската телевизиска продукција.
Покрај телевизиската и филмската кариера, Гоце Тодоровски беше долгогодишен член на Драмскиот театар во Скопје, каде што одигра бројни главни и споредни улоги, збогатувајќи го репертоарот на една од најзначајните национални културни институции.
Неговото заминување претставува голема загуба за македонската уметност и култура. Сепак, богатото актерско наследство, незаборавните улоги и насмевките што им ги подари на гледачите ќе продолжат да живеат како сведоштво за неговиот исклучителен талент.
До семејството, пријателите, колегите и сите почитувачи на неговото дело се упатуваат искрени изрази на сочувство.
