Информација за наводно киднапирање на македонскиот пејач Даниел Кајмакоски во Белград денес ја пренесоа повеќе српски портали, повикувајќи се на пишување на „Курир“. Според тие наводи, инцидентот се случил во близина на Бетон хала, каде што, како што се тврди, пејачот бил присилно внесен во автомобил.
Медиумските извештаи наведуваат дека непознати лица го врзале и го возеле во неговото сопствено возило, барајќи од него околу 20.000 евра. Според извор за „Курир“, осомничените наводно биле странски државјани, а не се исклучува можноста да станува збор за мигранти.
Во написите се додава дека киднаперите се движеле во правец на Рума, каде што, при обид на сообраќајната полиција да го запре возилото, удриле во заштитна ограда, по што го напуштиле автомобилот и избегале. По нив, според истите извори, сѐ уште се трага.
Засега нема официјална потврда од српските институции дека се случил ваков настан, ниту изјава од Даниел Кајмакоски или од негови блиски соработници. Информациите што се појавија во јавноста се базираат исклучиво на медиумски извори и предизвикаа големо внимание во Македонија и во Србија.
