Четиригодишната Елора Ели Ан Рад се разболела откако грипот се проширил во нејзиното семејство за време на празниците, изјавија нејзините родители, Сара и Мајкл Рад, за американскиот медиум ABC 4.
Родителите ја однеле девојчето во болница во Огден, сојузната држава Јута, каде што лекарите ѝ дијагностицирале грип и аденовирус. Поради сериозно намалено ниво на кислород, Ели била задржана на болничко лекување.
Состојбата брзо се влошила. Девојчето развило пневмонија и сепса, по што итно било префрлено во специјализирана детска болница. Мајката изјави дека Ели поминала околу четири дена на интензивна нега, а на денот кога починала, лекарите при компјутерска томографија откриле дека доживеала мозочен удар.
Бидејќи медицинските тимови не успеале да ја стабилизираат состојбата, родителите донеле тешка одлука да биде исклучена од апаратите за одржување во живот. Елора починала на 6 јануари.
По трагедијата, покрената е кампања на платформата GoFundMe за финансиска помош на семејството Рад. Таткото ја опиша својата ќерка како исклучително нежно, грижливо и слатко дете, додека мајката раскажа дека Ели обожавала да си игра со кукли и Барби и секојдневно ѝ носела подароци направени во градинка.
Семејството вели дека и натаму има повеќе прашања отколку одговори. Мајката посочи дека не може да разбере зошто токму нејзината ќерка толку тешко ја поднела болеста. Нивното најстаро дете исто така било хоспитализирано со пневмонија и бронхитис, но за среќа, состојбата му се подобрила.
Во меѓувреме, здравствените власти предупредуваат на зголемен број случаи на грип. Во Јута оваа сезона се регистрирани најмалку 725 хоспитализации поврзани со грип, според податоците на државниот Оддел за здравство и човечки услуги.
На национално ниво, најновите податоци на CDC покажуваат дека неделната стапка на хоспитализации, главно поврзани со вирусот H3N2, познат и како „супер грип“, е зголемена за 53 проценти во однос на претходната недела. Вкупниот број хоспитализации за сезоната бележи пораст од 37 проценти.
Речиси 40.000 луѓе во САД биле хоспитализирани поради грип во една недела, што е значително повеќе во споредба со 33.000 од претходната седмица. Најпогодени се малите деца, кои поради неразвиениот имунолошки систем сочинуваат најголем дел од амбулантските посети поврзани со грип.
