Српскиот претседател Александар Вучиќ вечерва најави дека по оставката на премиерот Милиош Вучевиќ ќе повика на консултации партиски претставници.
Во обраќањето до јавноста од Палатата Србија во Белград, тој прецизираше дека ќе ги покани на консултации за формирање нова влада или предвремени избори, додавајќи дека е „за двете опции“.
Тој појасни дека по оставката на премиерот, според процедурата, ова се констатира во српското Собрание и дека има рок од 30 дена за избор на нова влада.
„Ако не, тогаш одиме на избори“, рече српскиот претседател.
Тој додаде дека Вучевиќ, кој е и претседател на владејачката Српска напредна партија (СНС), започнал разговори со коалициските партнери на овие теми.
Вучиќ претходно учествуваше на вонредна седница на Владата на Србија.
Вучиќ рече дека Владата во текот на својот технички мандат ќе донесе неколку одлуки.
„Можеме да имаме избори за околу 75 дена, најреално април“, рече Вучиќ.
Тој нагласи дека нема да има преодни влади.
„Народот во Србија сака нормални луѓе на власт, а не политичари во кои немаат доверба и кои би ги организирале своите фаланги за да ги бркаат политичките противници. Кога сме оделе ние да спречуваме политичка трибина на кој било, како што беше пред некоја вечер во Раковица? Кои сте вие тоа да го браните? Што сте си замислиле во главата? Само затоа што државата е толерантна и трпелива, не значи дека е можно да уништувате туѓи животи. Наша главна задача во следниот месец е да ја одржиме целосната стабилност. Јас лично ќе се ангажирам“, изјави Вучиќ.
Вучиќ нагласи дека како претседател ќе предложи мандатар, но дека има ограничувања.
„Морам да предложам мандатор за кој ќе ми каже парламентарното мнозинство, или некој ме убеди дека има парламентарно мнозинство за избор на мандатор. Така јас ќе ги започнам разговорите. Имав три или четири имиња на ум, но не сум сигурен дека нема да одиме на избори. Значи, само за десет дена, кога ќе ви кажам дали ќе одржиме избори или ќе избереме нова влада, тогаш ќе бидам подготвен да зборувам и за кандидатите за премиер“, рече Вучиќ.
Вучиќ рече дека нападите врз просториите на Српската напредна партија (СНС) траат низ Србија со денови и недели.
„Каде и да му текне на некој, мисли дека има право да ги загрозува просториите и луѓето во тие простории. Така и претходната вечер, помеѓу три и четири часот наутро, речиси истите луѓе од истата анархистичка група во Нови Сад почнале да чкртаат, да поставуваат шаблони на партиските простории. Момците од партиските простории излегле, ги оттурнале и ги отстраниле. Тогаш се случи нешто скандалозно, што не го разбираме, дека овие момци почнале да ги бркаат оние кои поставувале шаблони по улиците на Нови Сад и на крајот повредиле една девојка“, истакна Вучиќ во своето обраќање.
„Не можеме да прифатиме дека по нашиот повик за дијалог, разговор, целосен мир, некој го нарушува во наше име. Тие момци што го направија тоа нанесоа огромна штета на државата Србија, на својата партија и на секој од нас“, рече Вучиќ.
Тој рече дека „опозицијата заедно со студентите постигнаа голем политички автогол во Автокоманда со многу помал број присутни од очекуваното“.
„Заедно со многу други работи што ни одеа по пат, а потоа како гром од ведро небо се појави ова за што зборувам. Милош побара да разговара со мене и рече дека како одговорен и човек кој дошол од Нови Сад, смета дека тој и градоначалникот Ѓуриќ треба да поднесат оставки“, рече Вучиќ.
Тој рече дека Вучевиќ добро ја вршел работата и не направил ништо лошо.
„Но, тој верува дека овој принцип на објективна одговорност мора да го поставиме поинаку во споредба со сите наши претходници“, рече Вучиќ.
Тој рече дека потегот на Вучевиќ ќе влезе во аналите на одговорните, на сериозните.
„Покажува дека фотелјата не му е поважна од принципите и така постапи“, рече српскиот претседател.
Тој посочи дека по оставката на српскиот премиер Милош Вучевиќ, постапката е следна:
„Оставката се констатиран во Народното собрание, од тој момент почнува рок од 30 дена, со сите процедури во рок од 30 дена, мора да се избере нова Влада. Доколку не се избере, автоматски се распишуваат избори“, рече Вучиќ.
Претседателот е должен да покрене процедура за избор на нова Влада, посочи тој.
„Нема да избегнувам консултации, иако знам дека ќе добијам само навреди и не знам што друго од оние кои веќе немаат ни два-три проценти на српската политичка сцена, а мислат дека со тоа некому му се додворуваат“, рече Вучиќ, посочувајќи дека ќе ги покани сите на консултации.
„Значи, да разговараме дали треба да одиме кон формирање влада или да одиме на избори. Отворен сум и за двете опции“, рече Вучиќ.
Тој рече дека Србија благодарение на неодговорните игри и однесување на одредени политички актери е доведена во тешка ситуација и под огромен притисок.
„Нашата стабилност, граѓански мир и многу други работи се загрозени. Некои вршат насилство секој ден на секој можен начин“, рече Вучиќ.
Претседателот на Србија изјави дека утре ќе потпише помилување за 13 лица кои биле уапсени на претходните протести.
„Има процедура, има комисија за помилување, ќе ја потпишам утре попладне“, рече Вучиќ.
