Летото 2024 година ги собори глобалните рекорди за топлина втора година по ред, што го прави веројатно најжешкото досега, соопшти европската служба за климатски промени Коперник (C3S).
Глобалните просечни температури од јуни до август беа 0,69 степени над просекот од 1991 до 2020 година, надминувајќи го претходниот рекорд од 0,66 степени поставен во 2023 година, според климатскиот монитор на Европската унија.
Европа го доживеа најжешкото лето досега, со температури кои се искачија на 1,54 степени над просекот, надминувајќи го претходниот рекорд од 1,34 степени во 2022 година.
Август 2024 година беше врзан со август 2023 година и беше забележан како најтопол август во светот, со просечна температура на воздухот на површината од 16,82 степени. Глобалната просечна температурна аномалија од почетокот на годината (од јануари до август 2024 година) е 0,70 степени над просекот, што ја прави сè поголема веројатноста дека 2024 година ќе биде најтоплата година досега, објави Коперник.
„Во текот на изминатите три месеци, светот се соочи со најтоплите јуни и август, најтоплиот ден досега и најжешкото бореално лето“, рече заменик директорот на C3S, Саманта Бурџис.
Таа предупреди дека екстремните температурни настани на кои сме сведоци ова лето само ќе се интензивираат, со уште попогубни последици за луѓето и планетата, доколку не се преземат итни мерки за намалување на емисиите на стакленички гасови.
Просечната температура во Европа во текот на трите летни месеци беше највисока досега, со 1,54 степени Целзиусови над просекот од 1991 до 2020 година, надминувајќи го претходниот рекорд од 1,34 степени Целзиусови поставен во 2022 година.
Според извештајот на Коперник, условите биле повлажни од просечните во западна и северна Европа. Во поголемиот дел од медитеранскиот регион и во Источна Европа, условите беа посуви од просекот, што доведе до суша на некои места.
Климатската служба на Европската унија Коперник редовно објавува податоци за температурата на површината на Земјата, морската ледена покривка и врнежите. Резултатите се базирани на компјутерски генерирани анализи кои земаат предвид милијарди мерења од сателити, бродови, авиони и метеоролошки станици ширум светот.