За повеќе детали за овој случај „360 степени“ се обрати до полицијата, а од таму добивме одговор дека станува збор за инцидент што се случил пред два месеца и бил целосно расчистен
Петнаесетина медиуми денеска пренесоа видео од тепачка во салон за бела техника во Скопје, на кое се гледа како две лица напаѓаат еден вработен, а при обидот на негов колега да му помогне, напаѓачите удираат и по вториот вработен.
„360 степени“ за повеќе детали за овој случај се обрати до полицијата, а од таму добивме одговор дека станува збор за инцидент што се случил пред два месеца и бил целосно расчистен.
„Расчистен е нападот во ‘Техномаркет’, насилниците се приведени пред месец и половина. Апелираме да не се шират лажни вести“, се вели во одговорот што го добивме од Министерството за внатрешни работи.
Оттаму прецизираат дека настанот се случил на 20 септември годинава во продажен објект кај арената „Тоше Проески“, полицијата пет дена подоцна ги привела напаѓачите – 25-годишниот Ф.В. и 33-годишниот А.Ф., двајцата од Скопје.
„Полициски службеници од Единицата за насилен криминал при СВР Скопје на 25.9.2023 г. ги лишиле од слобода Ф.В.(25) и А.Ф.(33), двајцата од Скопје поради основано сомнение дека на 20.9.2023 г. во продажен објект кај арената ‘Тоше Проески’ физички го нападнале вработениот А.В. од Скопје. Двајцата биле задржани во полициска станица и во службен разговор со полициски службеници го признале делото“, се вели во полициското соопштение.
Од МВР додаваат дека во координација со јавен обвинител против напаѓачите е поднесена кривична пријава, а од судија на претходна постапка определена им е мерка домашен притвор.
„Апелираме да не се шират лажни вести кои имаат за цел да ги вознемират граѓаните“, се нагласува во известувањето од МВР.